Мадуронинг тарафдорлари Гуайдони депутатлик дахлсизлигидан маҳрум этишди

Венесуэла парламенти спикери, ўзини мамлакатнинг вақтинчалик президенти сифатида эълон қилган мухолифатчи Хуан Гуайдо депутатлик дахлсизлиги ҳуқуқидан маҳрум қилинди.

Associated Press хабарига кўра, амалдаги президент Никола Мадуро тарафдорлари томонидан тузилган қонунчилик органи — Миллий таъсис мажлиси шундай қарор қабул қилган. Унинг раҳбари Диосдадо Кабеллонинг айтишича, айни вақтда Гуайдони судга тортиш жараёнини бошлашга имкон берувчи қарорни қабул қилиш устида иш олиб борилмоқда.

Бу қарор Венесуэла қонунчилигига зид бўлиб, депутатлик дахлсизлигидан маҳрум этиш қарорини айни вақтда Гуайдонинг ўзи томонидан бошқарилаётган парламент тасдиқлаши керак бўлади.

Хуан Гуайдо уни бу қарор «заррача қўрқитмаётгани» ҳақида гапирган. Шу билан биргаликда, у Мадуро ҳукумати ўзини ўғирлаб кетишга ҳаракат қилиши мумкинлигидан огоҳлантирган.

Венесуэла бош прокуратураси январь ойида Хуан Гуайдога нисбатан суриштирув ишларини бошлаганди. Унга расман айблов илгари сурилмаган. Венесуэла олий суди Гуайдога мамлакат ҳудудини тарк этишни тақиқлаганди, лекин у февраль ойида бу тақиқни бузиб, Колумбияга ўтиб келди.

Хуан Гуайдо март ойида 6 апрель куни Венесуэлада Николас Мадуро режимини қулатишга қаратилган «Озодлик операцияси» номи остидаги намойишлар бошланишини маълум қилганди.