VW Passat дунёда энг кўп сотилувчи ўрта синфдаги автомобил бўлди

Volkswagen Passat дунёда энг кўп сотилувчи ўрта синфдаги автомобил бўлди. 46 йил давомида немис маркаси ушбу моделдаги автомобилдан 30 млн дона ишлаб чиқарган. Юбилей сондаги Passat Германиянинг Эмден шаҳридаги завод конвейеридан чиққан. 

Юбилей “Пассат” GTE модификациясидаги кумушранг универсал бўлиб, 156 от кучига эга бензин турбомотор ва 115 от кучига эга электромотор негизидаги гибрид куч қурилмаси билан жиҳозланган. Ушбу автомобил электромоторда 55 км йўл боса олади. Гибрид ҳозирдаёқ 2021 йилдан кучга кирадиган Euro 6d экологик меъёрларига мувофиқ келади.

Ҳозирда VW Passat учта қитъада ишлаб чиқарилади, 10 та заводда йиғилади ва 100дан кўпроқ давлатда сотилади.

“Пассат” ишлаб чиқарилиши ҳажми бўйича 45 йил ичида 35 млн дона ҳажмда чиқарилган “Гольф”дангина ортда қолади.