Эфиопияда этник тўқнашувлар оқибатида ўнлаб одамлар ҳалок бўлди

Эфиопиянинг ғарбида этник тўқнашувлар оқибатида бир неча ўн одам ҳалок бўлди. Бу ҳақда Банишангул-Гумуз вилояти вакилига иқтибос келтирган ҳолда Addis Standard нашри хабар берди.  

Нашрнинг маълум қилишича, вилоятнинг жамоатчилик билан алоқалар бўйича бошлиғи  Гелета Хайлу гумуз ва шинаша этник гуруҳларининг бир неча ўн вакили ҳалок бўлганини тасдиқлаган.

Хайлунинг таъкидлашича, қотилликларни қуролсиз одамларни пала-партиш ўққа тутган қуролланган гуруҳлар содир этган. У тўқнашувлар оқибатида ҳалок бўлганларнинг сонини айтишга ҳали эрталигини, дастлаб тафсилотларни ўрнатиш лозимлигини айтган.

Эфиопия бош вазири ўринбосари Демеке Меконнен маҳаллий агентлик AMMA’га интервьюсида тўқнашувлар вилоятнинг турли жойларида бир ҳафта олдин ўлдирилган 18 киши учун ўч олиш бўлганини айтган.