Австралия осмонида автомобил ўлчамидаги метеорит портлади (видео) 

21 май кун оқшомда Австралия жанубида метеор кузатилди. Астроном Дэвид Финлэйнинг таъкидлашича, само жисми Аделаида шаҳридан 400 км жанубда океанга тушган. Унинг оғирлиги 20-40 тоннага баҳоланган, ўлчами эса автомобилдек келган. Сайёрамиз атмосферасига кириш вақтида 40 минг км/соат тезликка эга бўлган метеороид осмонда портлаган. Портлаш кучи тротил эквивалентида 1,6 килотоннани ташкил қилган – бу Япониянинг Хиросима шаҳрида портлаган атом бомбаси кучининг ўндан бирини ташкил қилади. 

Астрономнинг айтишича, метеороид портлаш вақтида бўлакларга бўлиниб кетган бўлса-да, аҳоли пунктларига хавф солган, чунки ерга унинг 3-4 тонналик бўлаклари тушиши мумкин бўлган. Тошлар уйлар ва автомобиллар томларини тешиб ўтиши мумкин эди.

NASA’нинг реактив тезлик лабораторияси ходими Стив Чеслининг айтишича, бу метеор АҚШ миллий аэрокоинот агентлиги стандартларига кўра анча кичик бўлган. Само жисми ёши 10 млн йилни ташкил қилади, пайдо бўлган ери эса Марс ортидаги астероидлар камари ҳисобланади. Олим метеорни кичик автомобилдек келишини айтган ва бундай ўлчамдаги объектлар сайёрамиз атмосферасига йилига тахминан 3-6 марта тушишини қўшимча қилган.