Формула-1: Льюис Хэмилтон Канададаги босқичда ғолиб бўлди

Фото: TASS/The Canadian Press/PA Images/Paul Chiasson

Mercedes жамоасининг пойгачиси, амалдаги чемпион Льюис Хэмилтон “Формула-1” пойгасининг 7-босқичи – Канада Гран-присида ғолиб бўлди.

Марра чизиғини биринчи бўлиб Ferrari аъзоси Себастьян Феттель кесиб ўтган, бироқ унга 5 жарима сонияси берилган. Бунга эса унинг 48-айланада трассага хавфли қайтиши сабаб бўлган, бунинг оқибатида Хэмилтон деворга урилишига бир бахя қолган.

Was shaping up to be a great #CanadianGP but don't understand why Vettel/Ferrari were given a time penalty (and will lose the race) but where else was he supposed to go? He didn't do this deliberately. Leaves a sour taste in all the fan's mouths after this 😩 pic.twitter.com/DrfKfS1ld1
— Richard-Lee Read (@OMGitsRLR) June 9, 2019

Феттель гарчи биринчи келган бўлса-да, жарима сониялари сабабли 2-ўринга тушиб кетган. 3-ўринни Ferrari’нинг яна бир аъзоси Шарль Леклер эгаллаган.

Феттель жарима ва пойга натижаларидан норозилик билдирган. Бунинг ишораси сифатида у матбуот билан суҳбатлашишдан бош тортган. Шунингдек, пойгачи болидлар олдидан ўтаётганда пойгачилар қайси ўринларни эгаллаганларини кўрсатувчи табличкаларни ўзгартириб қўйган. У Хэмилтон машинаси олдига 2 рақами, ўзининг болиди олдига эса 1 рақами ёзилган табличкани қўйган.

Умумий ҳисобда 162 очко билан Хэмилтон еткачилик қилмоқда. 2-ўринни Валттери Боттас (132 очко), 3-ўринни Феттель (100 очко) эгалламоқда.

Пойганинг навбатдаги босқичи 21-23 июнь кунлари Францияда бўлиб ўтади.