Ўзбекистон мудофаа вазири Баҳодир Қурбонов АҚШга ташриф буюради

Баҳодир Қурбонов/Фото: Мудофаа вазирлиги матбуот хизмати

Ўзбекистон Республикаси мудофаа вазири Баҳодир Қурбонов бу ҳафта АҚШга ташриф буюради. Бу ҳақда АҚШнинг Ўзбекистондаги элчиси Даниэл Розенблюм маълум қилди.

“Мен Ўзбекистон билан хавфсизлик бўйича ҳамкорлигимизни чуқурлаштиришни истайман. Бу нафақат кучли муштарак мақсад ўлароқ биргаликда Афғонистонга тинчлик ва фаровонлик олиб келишни, балки бузғунчи экстремизм, трансмиллий жиноят, гиёҳванд моддалар савдоси ва бошқа хатарларга қарши курашда ҳамкорлик қилишни ҳам англатади.

Биз бу соҳада биргаликда кўп иш қилмоқдамиз, бу ҳафта мудофаа вазири Баҳодир Қурбонов АҚШга сафар қилиб, Вашингтонда расмийлар, жумладан, мудофаа вазири вазифасини бажарувчи жаноб Эспер билан учрашади”, - деди элчи.

Шу билан бирга, унинг қўшимча қилишича, Қўшма Штатлар маълум бир соҳаларда, масалан суд-ҳуқуқ ислоҳотлари, соғлиқни сақлаш ва таълим соҳаларида Ўзбекистонга фойдали тажриба ва билим таклиф этиши мумкин.