Токио Олимпиадаси медаллари тақдим этилди

2020 йилги Токио Олимпиадаси ташкилотчилари Токиода ғолиб спортчилар тақдирланадиган медаллар дизайнини тақдим қилди.

Ҳар бир медалда шахмат тартибида жойлаштирилган оқ ва индиго рангидаги тўртбурчаклардан иборат “итимацу” анъанавий нақшига эга сферик шаклда бажарилган Олимпиада эмблемаси бор. Медалнинг орқа томонида қадимги юнон афсоналаридаги Ника маъбудаси тасвири туширилган. Медаллар дизайни Дзюнъити Каваниси томонидан яратилган.

Олимпия медаллари 550 грамм келиб, қисман аввал истеъмолда бўлган электроникадан тайёрланган. Япония ҳукумати шу мақсадда акция эълон қилган ва унинг давомида 79 тоннага яқин электроника йиғилган. Бунинг натижасида 32 кг олтин, 3,5 тонна кумуш ва 2,2 тонна бронза олишга муваффақ бўлинган. 

The moment you have all been waiting for, your #Tokyo2020 Olympic Medals! 🥇🥈🥉

RT for good luck! 100% #Sustainable #1YearToGo pic.twitter.com/DcLKtEF0DQ

— #Tokyo2020 #1YearToGo (@Tokyo2020) July 24, 2019

Аввалроқ 2020 йилги Олимпиада ва Паралимпиада рамзий тимсоллари Мирайтова ва Сомэйти деган ном олгани маълум қилинганди. Ушбу номлар 2018 йил декабридан 2019 йил февралигача Япониядаги бошланғич синфлар ўқувчилари орасида ўтказилган овоз бериш натижаларига кўра танланган. 

Токио Олимпиадаси 2020 йил 24 июлдан 9 августгача, Паралимпиадаси эса 28 августдан 6 сентябргача бўлиб ўтади.