Туркистонда «Бир йўл – бир тарих» туристик форуми бошланди

Қозоғистоннинг Туркистон шаҳрида «Туркистон: бир йўл – бир тарих» халқаро туристик форуми ва ҳунармандлар фестивали ўтказилмоқда.

Фото: Ўзбектуризм

4 ноябрь куни йирик тадбир Туркистон шаҳрининг маданият уйи конференция залида бўлиб ўтди. Унда 16 давлатнинг 300 нафардан ортиқ туризм соҳаси вакиллари иштирок этишди, деб хабар бермоқда Kun.uz мухбири.

Форумда Қозоғистон расмийлари қаторида Ўзбекистон Бош вазири ўринбосари Азиз Абдуҳакимов, Туризмни ривожлантириш давлат қўмитаси раиси в.б. Абдулазиз Оққулов нутқ сўзлади.

Халқаро форумдан кўзланган мақсад – туристик ҳакмкорликни ривожлантириш, кадрлар салоҳиятини ошириш, Буюк ипак йўлида жойлашган Туркистоннинг туристик имкониятларини кенгайтириш, тўғридан-тўғри инвестицияни жалб этишдир. Тадбирнинг Ўзбекистон учун аҳамияти шундаки, унда туризмнинг турли йўналишларида манфаатли меморандумлар имзоланди.

Форум доирасида 4-5 ноябрь кунлари «Silk Road Craftsman – 2019» халқаро ҳунармандлар фестивали ўтказиш режалаштирилган. Унда Ўзбекистон, Озарбойжон, Туркия, Россия, Эрон, Ҳиндистон, Қирғизистон, Афғонистон каби мамлакатлардан 200дан ортиқ ҳунармандлар қатнашишади. Ярмарка ҳунармандчилик анъаналари сақланиши ва янада кенг ёйилишига хизмат қилади.