Юрак хуружидан огоҳлантирувчи мобил дастур ишлаб чиқилди

Юрак хуружидан огоҳлантирувчи мобил дастур ишлаб чиқилди. Дастур ёрдамида юрак хуружи хавфини аниқлаш мумкин. Бу ҳақда Fainaidea нашри хабар берди. 

Одатда юрак фаолиятига ташхис қўйишда электрокардиограмма қўлланади. Бироқ ҳар доим ҳам буни амалга оширишнинг иложи бўлмайди.

Янги дастур гаджетлар учун ишлаб чиқилган ва Android ҳамда iOS операцион тизимлари негизида ишлайди. Дастурдан фойдаланиш учун бор-йўғи икки датчикни танага улаш керак, ваҳоланки электрокардиограммада 12 та датчик қўлланади.

Энди смартфон ҳамда ушбу дастурга эга киши юрак хуружи бор-йўқлигини тезда аниқлаши мумкин.

Кардиологлар дастурни синовдан ўтказгач, у аниқ ишлашини ва анъанавий электрокардиограммадан ҳеч ҳам қолишмаслигини айтишган.

Шифокорларнинг таъкидлашича, ушбу ноу-хау одамларга хавфли аломат бўлганда тезкор малакали тиббий ёрдам олишда ёрдам беради.