Туркия Суриядаги ҳарбий амалиётни қайта бошлаш билан таҳдид қилди

Агар Москва ва Вашингтон Сурия бўйича мажбуриятларини бажармаса, Туркия курд отрядларига қарши ҳарбий амалиётини қайта бошлаши мумкин. Бундай таҳдид билан Туркия ташқи ишлар вазири Мавлут Човушўғлу чиқди, деб хабар берди Yeni Safak нашри.   

Човушўғлунинг таъкидлашича, Туркия АҚШ ва Россия билан эришилган келишувларнинг ўзига тегишли қисмини бажарган. Бироқ Москва ва Вашингтон ўз мажбуриятларини бажармаяпти. “Агар биз натижа кўрмасак, унда АҚШ билан келишишга уринишдан кейин бошлаганимиздек, амалиётни қайта бошлаймиз”, деб айтган Туркия ташқи ишлар вазири.   

“Суриядаги қуролланган курд отрядларига қарши “Тинчлик булоғи” амалиёти 9 октябрда бошланган эди. 17 октябрда АҚШ вице-президенти Майк Пенс ва Туркия президенти Ражаб Тоййиб Эрдўған ўртасидаги музокаралардан кейин Анқара амалиётни 120 соатга тўхтатишга ва курд тузилмаларининг хавфсизлик ҳудудидан олиб кетилишини кутишга рози бўлган. Бироқ бу келишув эртаси куниёқ бузилган.  

Амалиёт 22 октябрда Эрдўған ва Россия президенти Владимир Путин ўртасида Сурия шимолидаги хавфсизлик ҳудудини биргаликда патруллаш ҳақида эришилган келишувдан кейин якунланганди.