Трамп: Шимолий Корея АҚШга қарши борса, бор-будини йўқотади

Шимолий Корея етакчиси Ким Чен Ин АҚШга нисбатан душманлик қилмайди, чунки бундай қилса, бор-будини йўқотишини тушунади. Бундай фикрни АҚШ президенти Дональд Трамп твиттердаги саҳифасида билдирди.

"Ким Чен Ин жуда ақлли ва душманона ҳаракатлар амалга оширса, кўп нарса, умуман бор-будини йўқотиши мумкин", деб айтган Трамп. "Шимолий Кореяда Ким Чен Ин раҳбарлигида ақлбовар қилмас иқтисодий салоҳият бор, аммо у ваъда қилинганидек, ядровийсизлашни амалга ошириши керак", деб қўшимча қилган АҚШ президенти.

7 декабрда Трамп Пхеньян Вашингтонга қарши ҳеч қандай душманона ҳаракатлар қилмаслиги ва АҚШдаги сайлов жараёнига аралашмаслигига ишончи комиллигини айтганди. Шунингдек, АҚШ етакчиси Ким Чен Ин билан яхши муносабатда эканлигини таъкидлаб ўтган.