Россия ва Украина газ транзити бўйича келишувга эришди

Россия ва Украина Европа Иттифоқига 2020 йил 1 январдан  газ транзити бўйича келишувга эришди. Бу ҳақда Еврокомиссия вице-президенти Марош Шефчович Берлинда ўтган учрашув натижаларига кўра хабар берди. 

“Биз умуман олганда келишувга эришдик”, деб айтган Шефчович ва буни “Европа, Россия ва Украина учун яхши янгилик” эканини таъкидлаб ўтган.  

Ўз навбатида, Россия энергетика вазири Александр Новак томонлар бўлғуси келишувга баённома лойиҳаси тайёрланганини, бироқ у бўйича мувофиқлашув лозимлигини маълум қилган. 

Россия ва Украина ўртасида Берлинда ўтган газ бўйича музокаралар 8 соатга яқин давом этган. Унда Россиядан “Газпром” бошқарув раиси Алексей Миллер ва Россия энергетика вазири Александр Новак, Украинадан энергетика ва атроф-муҳит вазири Алексей Оржель, “Нафтогаз” ижрочи директори Юрий Витренко ва “Украина ГТТ оператори” компанияси раҳбари Сергей Макогон иштирок этган.