Австралияда 20дан кўпроқ киши атайлаб ўт қўйишда айбланди 

Австралияда бир неча ойдан бери давом этаётган ўрмон ёнғинлари ортида 20дан кўпроқ киши атайлаб ўт қўйишда айбланди. Бу ҳақда CNN телеканали хабар берди. 

Австралия полицияси ўрмон ёнғинлари билан боғлиқ жиноятлар учун 183 кишига, жумладан 40 нафар балоғатга етмаган шахсга нисбатан судга даъво аризаси берган. 

183 кишидан 53 нафари алангадан фойдаланишга тақиқловга амал қилмаганлик учун огоҳлантириш олган. 47 киши эса ерга ўчмаган сигарет ёки гугурт ташлашда айбланган.

24 киши ёнғинлардан энг кўп талофат кўрган Янги Жанубий Уэльс штатида ўрмон ёнғинларини атайлаб бошлашда айбланган.

Австралиядаги ўрмон ёнғинлари оқибатида 6 млн гектардан кўпроқ майдон ёниб кетди. Ёнғинлар 25 кишининг ўлимига, 500 млндан кўпроқ жонзотнинг нобуд бўлишига сабаб бўлди. 

Яшил қитъадаги ёнғинлар тутуни Тинч океанидан ўтиб, Жанубий Америкагача, жумладан Чили, Аргентина ва Бразилиягача етиб борди.