Австралияда ёнғинлар сабабли норозилик намойишлари бошланди 

Австралияда мамлакатда бир неча ойдан бери давом этаётган ўрмон ёнғинлари сабабли кўп минг кишилик норозилик намойишлари ўтмоқда. Бу ҳақда 9News телеканали хабар берди.

Сиднейнинг ўзида 20 мингга яқин одам норозилик акциясига чиққан. Улар шаҳар ратушасидан парламент биносигача юриб ўтишган. Намойишлар талабалар ва Extinction Rebellion ҳаракати томонидан ташкиллаштирилган.  

Таъкидланишича, намойишчилар Австралия бош вазири Скотт Моррисоннинг истеъфосини талаб қилишмоқда. Уларнинг фикрича, бош вазир иқлим муаммоларига етарлича эътибор қаратмаган ва мамлакатдаги вазиятни эплай олмаяпти. Фаоллар, шунингдек, ёнилғининг янги, экологик тоза турларига ўтишни талаб қилишмоқда. 

Норозилик намойишлари Австралиянинг бошқа шаҳарларида, жумладан Аделаида ва Мелбурнда ҳам ўтмоқда.

Австралияда ўтган йилнинг октябридан ўрмон ёнғинлари давом этмоқда. Ёнғинлар сабабли 7 млн гектар майдоннинг кули кўкка совурилган, 25 киши ҳалок бўлган, 1 млрдга яқин жонзот нобуд бўлган.