АҚШ Сурияда ИШИДга қарши амалиётни яна фаоллаштирди

АҚШнинг Суриядаги ҳарбий бўлинмалари эронлик генерал Қосим Сулаймоний ўлдирилгандан кейин АҚШ кучларини ҳимоялаш мақсадида тўхтатилган аксилтеррорчилик амалиётини қайта бошлади. Бу ҳақда The Washington Post нашри АҚШ қуролли кучлари марказий қўмондонлиги бошлиғи Кеннет Маккензига таяниб хабар берди. 

Генерал Маккензининг таъкидлашича, аксилтеррорчилик амалиётини тиклаш жадал суръатлар билан бормоқда. АҚШ қўшинлари курд кучлари билан бирга ИШИДга қарши ҳафтасига 3-4 та амалиёт ўтказмоқчи.

“Ҳозирда биз биринчи навбатда ИШИДни яксон қилишга эътибор қаратмоқдамиз”, деб айтган генерал. У АҚШ қўшинлари Сурияда яна қанча вақт қолишига аниқлик киритмаган ва қўшинларнинг турли вазиятларга қарши туришга тайёрлигини маълум қилган. 

Аввалроқ АҚШнинг Сурия бўйича махсус вакили Жеймс Жеффри ИШИДга қарши халқаро коалиция кучлари ўз хавфсизлигини таъминлаш учун Ироқдаги амалиётларни вақтинчалик тўхтатганини маълум қилганди.