Франкфурт автосалони 70 йилдан кейин бошқа шаҳарга кўчириладиган бўлди

Франкфурт автосалони 2021 йилдан бошлаб бошқа шаҳарда ўтказилади. Унга мезбонлик қилиш ҳуқуқи учун Берлин, Гамбург ва Мюнхен курашмоқда.

Архив фото : KUN.UZ

2021 йилдан Франкфуртда 1951 йилдан бошлаб тоқ йилларда ўтказиб келинган халқаро автосалон Германиянинг бошқа шаҳрида ўтказиладиган бўлди. Бундай қарорни автосалонни ташкиллаштириб келувчи Немис автомобил саноати уюшмаси (VDA) қабул қилди.

2019 йилда VDA’нинг автосалон ўтказиладиган Messe Frankfurt кўргазма маркази билан шартномаси муддати якунланган ва октябрда ташкилот автосалонни компаниялар ва омма учун қизиқроқ қилиш мақсадида унинг янги концепцияси устида ишлаётганини маълум қилган. Ўшанда VDA 2021 йилги автосалонни ўтказишга аризалар қабул қилишини эълон қилган. Натижада ташкилотчилар Берлин, Кёльн, Франкфурт, Гамбург, Ганновер, Мюнхен ва Штутгартдан таклифлар олган.

VDA’нинг маълум қилишича, шаҳарлар тақдимотлари баҳоланиб, финалга Берлин, Гамбург ва Мюнхен аризалари чиққан. Бундан келиб чиқадики, автосалон Франкфуртда бошқа ўтказилмайди.

Таъкидланишича, автосалонга мезбонлик қиладиган шаҳар яқин ҳафталарда танлаб олинади.

Охирги йилларда йирик автосалонларга қизиқиш камаймоқда, аксарият автомобилсозлик компаниялари янги моделларини махсус тадбирларда тақдим қилишни афзал кўрмоқдалар. Шу сабабли баъзи автосалонлар ўз форматини ўзгартиришни бошламоқда. Мисол учун, Детройт автосалони ташкилотчилари мотор-шоуни январдан июнга кўчиришга қарор қилишган. Бунинг ҳисобига автосалон очиқ ҳавода турли томошалар, концертлар, тест-драйвлар, анжуманлар ва болалар учун кўнгилочар дастурлар билан ўтказилади.