Асака тумани ҳокими ишдан олинди

Андижон вилоятининг Асака туманида ҳам раҳбар ўзгарди.

Бугун, 4 март куни Андижон вилояти, Асака туманида фаоллар йиғилиши бўлиб ўтди.

Унда вилоят ҳокими Шуҳратбек Абдураҳмонов ва президент маслаҳатчиси ўринбосари Қаҳрамон Қуронбоев иштирок этди.

Йиғилишда туман ҳокими Эркинжон Абдуллаевич Якубов ишдан олинган. У 2017 йилнинг июлидан буён туманга раҳбарлик қилиб келаётганди.

Kun.uz мухбири хабар беришича, Бўстон туманининг (собиқ Бўз) собиқ ҳокими Иномжон Солижонович Мамадалиев Асака туманига янги раҳбар этиб тайинланган.

Иномжон Мамадалиев 1975 йил 24 январь куни Андижон вилояти Асака туманида туғилган. 1997 йилда Андижон давлат университетини тамомлаган, маълумоти бўйича мутахассислиги - журналист.

У муқаддам Асака шаҳар ИИБ ҳуқуқбузарликларни олдини олиш гуруҳи катта инспектори, Асака шаҳар ИИБ бошлиғининг шахсий таркиб билан ишлаш бўйича ўринбосари, ИИБ ҳуқуқбузарликларни олдини олиш бошқармаси бошлиғи бўлиб ишлаган. 2014 йил 13 майдан Асака тумани ҳокимининг биринчи ўринбосари - Асака шаҳар ҳокими сифатида ишлаган, 2018 йилнинг августида ҳозирги Бўстон (ўша вақтда Бўз) туманига ҳоким этиб тайинланганди.

Бундан аввалроқ Садбархон Неъматжоновна Мамитова Бўстон туманининг янги ҳокими этиб тасдиқланганди.

#тайинлов #Асака тумани #Иномжон Мамадалиев