Судан 23 йил ичида илк бор АҚШда ўз элчисини тайинлади

Судан деярли чорак аср ичида илк бор АҚШда ўз элчисини тайинлади. Элчининг тайинланиши Вашингтон ва Хартум 23 йиллик танаффусдан кейин элчилар айирбошлаш жараёнини бошлашга келиша олганидан кейин мумкин бўлди.

Фото: AFP

Бу ҳақда Судан ташқи ишлар вазирлиги маълум қилди, деб хабар қилди “Ахр Лаҳза” нашри.

Судан ташқи ишлар вазирлиги хабарида таъкидланишича, АҚШ ҳукумати Нуриддин Сотий номзодини Суданнинг Вашингтондаги элчиси лавозимига маъқуллаган. Хабарда таъкидланишича, Судан “инқилоб мақсадларига эришиш ва мамлакатнинг халқаро нуфузини тиклаш учун барча саъй-ҳаракатларни амалга оширмоқда”.

Судан элчисининг тайинланиши 2019 йил декабрда Вашингтон ва Хартум элчилар даражасидаги дипломатик муносабатлардаги 23 йиллик танаффусдан кейин элчилар айирбошлаш жараёнини бошлашга келиша олгани эвазига мумкин бўлди. Суданнинг Вашингтондаги янги элчиси бунгача Францияда элчи бўлиб ишлаган. Бундан ҳам аввалроқ у ЮНЕСКОда фаолият юритган, БМТ бош котибининг Африкадаги элчиси бўлган.

1993 йилдан бери Судан Эрон ва Сурия билан бир қаторда АҚШнинг халқаро террорчилик хомийлари рўйхатида туради. Бу эса қурол эмбаргоси ва АҚШ ёрдами чекланишини назарда тутади. Шу сабабли Судан халқаро молия тизимидан чиқарилган. Бу эса мамлакатда оғир банк инқирозига олиб келган. 1996 йилда Суданнинг АҚШдаги элчихонаси ёпилган. Охирги йилларда у Суданнинг Вашингтондаги ишлари бўйича вақтинчалик ишончли вакили даражасида фаолият юритган.