Лукашенко Беларусда Америка паспортига эга шахслар қўлга олинганини айтди

Лукашенконинг сўзларига кўра, мамлакатдаги вазиятни издан чиқаришни мақсад қилган кўплаб одамлар қўлга олинган.

Фото: РИА Новости

Беларусь президенти Александр Лукашенко республикада сайлов кампанияси вақтида қўлга олинганлар орасида "Америка паспортига эга бўлган, давлат департаментида ишлайдиган америкалик аёлларга уйланган" шахслар ҳам борлигини маълум қилди.

"Исм-шарифлари, манзиллари, пароллари ва борган жойлари маълум. Америкаликми, давлат департаментчисими, демократик партияга мансубми, буниси муҳиммас. Россиядаги сайловолди кампаниясида қатнашишган, яхшигина пул олишган. Бугун эса Беларусда шов-шув кўтаришмоқда. Америкаликлар уларни ҳимоя қилишни бошлайди деб ўйлайман. Бунақаси кетмайди", деди у.

Беларусда президентлик сайловлари 9 августда бўлиб ўтади. Президентликка Лукашенко билан биргаликда 5 киши даъвогарлик қилмоқда.

29 июлда Беларусда 33 нафар россиялик қўлга олингани хабар қилинганди. Улар республикада оммавий тартибсизликлар уюштиришга тайёргарлик кўришда гумон қилинмоқда.

#Беларусь #Александр Лукашенко

2020 йилнинг 9 августида Беларусда президентлик сайловлари ўтказилади. 26 йилдан буён мамлакатни бошқараётган Лукашенко бу сафар ҳам номзодини қўйган.