Академик лицейларда 15 октябрдан анъанавий дарслар бошланади

15 октябрь, пайшанба кунидан ОТМлар тасарруфидаги академик лицейларда 2020/21 ўқув йили анъанавий тарзда бошланади. Бу ҳақда Олий ва ўрта махсус таълим вазирлиги маълум қилди.

Белгиланишича, санитария-гигиена талаблари бажарилган тақдирда ва ота-оналар ҳамда депутатлардан ижобий хулоса берилгандан сўнг, академик лицейларда ўқув жараёнини бошлашга тайёрлиги ҳақида ҳудудий ишчи гуруҳларнинг хулосаси олинади.

Янги ўқув йилини анъанавий тарзда бошлашга тайёр бўлган академик лицейларда ўқув жараёнини бошлаш масаласи туман (шаҳар) халқ депутатлари кенгаши муҳокамасидан ўтказилади.

Шунингдек, ўқув жараёнларини бошлаш муддати ва шаклини белгилаш мақсадида ота-оналарнинг фикрини ўрганиш бўйича сўровномалар ўтказилади.

Таълим муассасасига ўқувчиларнинг анъанавий тарзда келиб ўқишлари мажбурий ҳисобланмайди.

Карантин талабларидан келиб чиқиб, таълим муассасаларида ўқувчилар турар жойлари ҳамда ошхона/буфетлар фаолият юритмайди.

Эслатиб ўтамиз, 12 октябрдан ОТМларнинг 1-курс талабалари учун танишув дарслари бошланади.