Volkswagen АҚШ компаниясини 3,7 миллиард долларга сотиб олади

Volkswagen компаниясининг юк машиналар ишлаб чиқарувчи Traton Group шўъба компанияси АҚШдаги рақобатчиси - Navistar International компаниясини сотиб олишини эълон қилди.

Фото: Reuters

Traton айни вақтда АҚШ компаниясининг 16,7 фоиз акциясига эга. Энди у компаниянинг қолган 83,3 фоиз акциясини 3,7 млрд долларга сотиб олмоқда. АҚШ компаниясининг умумий қиймати 4,4 млрд долларга баҳоланмоқда.

Traton Navistar акциядорларига ҳар бир акция учун 44,5 доллардан тўлайди. Битим 2021 йилнинг ярмигача якунланиши кутилмоқда.

Volkswagen харидни амалга ошириш учун Traton’га 3,9 млрд доллар кредит тақдим қилади. Navistar’нинг сотиб олиниши Volkswagen’га тегишли юк машиналари брендлари, жумладан Man ва Scania’ни бирлаштирувчи Traton’га АҚШдаги бизнесини кенгайтиришига имкон бериши керак. Айни вақтда Traton савдоларининг 2 фоиз улуши АҚШга тўғри келади. Navistar эса АҚШдаги юк машиналар бозорининг 15 фоизини назорат қилади.