Австралияда маҳаллий вакцина синовлари тўхтатилди 

Австралияда коронавирусга қарши ишлаб чиқилган маҳаллий вакцина синовлари бир неча синалувчиларда ОИВ-инфекциясига тестлар ёлғон мусбат натижа бергандан кейин тўхтатилди. Бу ҳақда вакцинани ишлаб чиққан Квинсленд университети ва CSL Limited биотехнологик компаниясининг қўшма баёнотида маълум қилинган.

“Вакцинанинг иккинчи ва учинчи босқич синовлари давом эттирилмайди, чунки ундаги компонентлардан бирига иммун жавоб ОИВ-инфекцияга тестлар ўтказишда халақитлар ҳосил қилмоқда”, дейилган хабарда. 

Шу сабабли Австралия бош вазири Скотт Моррисон вакцинани ишлаб чиқариш бўйича тузилган келишув бекор қилинганини маълум қилган. Вакцинани ишлаб чиқаришга мўлжалланган маблағлар бошқа ишончли вакциналарни сотиб олишга йўналтирилади. Австралия ҳукумати бу мақсадда 3,5 млрд Австралия доллари (2,5 млрд доллар) ажратишни кўзда тутган.