Эрон генерал Сулаймонийнинг ўлдирилишига алоқадор шахслар рўйхати тузди

Фото: ТАСС

Эрон ҳукумати Ислом инқилоби муҳофизлари корпусининг «Ал-Қудс» махсус бўлинмаси қўмондони, генерал Қосим Сулаймонийнинг ўлимига алоқадор 48 кишидан иборат рўйхатни тузди. Бу ҳақда Mehr News нашри ўз манбасига таяниб хабар берди.

Инсон ҳуқуқлари бўйича кенгаш раҳбари Али Бағирий Қанийнинг сўзларига кўра, Эрон ҳукумати Сулаймонийнинг ўлдирилишига алоқадор 48 кишининг шахсини аниқлашга муваффақ бўлган ва уларни жавобгарликка тортиш бўйича чоралар кўрилган. Хусусан, Теҳрон генерални йўқ қилиш бўйича операцияга у ёки бу даражада жалб этилган мамлакатлардан маълумот тақдим этишни талаб қилган.

Амалдорнинг айтишича, Эрон ҳукумати ана шундай мурожаат билан чиққан охирги мамлакат Германия бўлган.

«Биз Германиядаги АҚШ авиабазаси Сулаймонийни ўлдиришда фойдаланилган дронлар ўртасида маълумот алмашишда қатнашганлиги тўғрисида ахборот олдик», — деди Қаний.

Қосим Сулаймоний шу йил 3 январда Бағдод аэропорти яқинида АҚШ дрони зарбаси натижасида ўлдирилганди. У билан бирга 4 нафар эронлик ҳарбий ва Ироқ армиясининг 5 вакили ҳалок бўлган.

Тайёрлаган Дилшод Аскаров

#Эрон #Қосим Сулаймоний

Эрон ташқи сиёсати бунёдкори, Яқин Шарқ бўйича бош стратеги, Эрон Ислом инқилоби муҳофазаси корпуси таркибидаги «Кудс» махсус бўлинмаси қўмондони Қосим Сулаймоний Бағдоддаги аэропортда АҚШ президенти Дональд Трамп фармойишига биноан ўлдирилди.