Францияда санитар чоралар кучайтирилмоқда

Франция бош вазири Жан Кастекс ва соғлиқни сақлаш вазири Оливе Веран коронавирус пандемиясининг учинчи тўлқинини тўхтатишга қаратилган янги чоралар киритилишини эълон қилди. Бу чоралар орасида комендантлик соати амал қилишининг кенгайтирилиши бор бўлиб, у 15 департаментда соат 18дан бошланади.

Ушбу департаментларга 8 январда яна 10 департамент қўшилиши мумкин. Мамлакатнинг қолган қисмида комендантлик соати 20дан бошлаб амал қилиши сақланиб қолади.
        
Бош вазир ҳукумат бар, кафе ва ресторанлар эгалари ҳамда маданият арбобларига пешвоз чиқа олмаслигидан афсусдалигини айтган. Театр, музей, кинозаллар январ охиригача, ресторанлар эса феврал ўртасигача ёпиқ қолади. 

Франция ҳукумати, шунингдек, ташқи чегаралардаги назоратни кучайтирмоқда. Британия билан чегара “коронавируснинг инглизча варианти” пайдо бўлгани сабабли янги кўрсатмалар берилгунга қадар ёпиқ қолади. Мамлакатга  коронавируснинг йўқлигини тасдиқловчи ПЦР-тестсиз кириб бўлмайди.

Францияда кунига 15 минг янги касалланиш ҳолати қайд қилинмоқда. Ҳукумат бундай оғир вазиятдан чиқишнинг ягона йўлини эмлашни тезлаштиришда кўрмоқда. “Эмлаш - биринчи устувор вазифадир”, деб таъкидлаб ўтган Франция бош вазири.