Қўшимча функционаллар
-
Тунги кўриниш
АҚШда карантин чекловларини бекор қилиш бошланди
Техасда 10 мартдан барча корхоналар фаолиятини қайтадан бошлаш ҳамда чекловларнинг "катта қисми"ни бекор қилиш режалаштирилмоқда. Миссисипида чоршанбадан бошлаб жамоат жойларида ниқоб тақиш режими бекор қилинади.
Фото: Reuters
АҚШнинг Техас ва Миссисипи штатлари асосий карантин чекловлари бекор қилинишини эълон қилди. Бу ҳақда NBC News хабар бермоқда.
Техасда 10 мартдан барча корхоналар фаолиятини қайтадан бошлаш ҳамда чекловларнинг "катта қисми"ни бекор қилиш режалаштирилмоқда.
"Техасни юз фоизга очиш вақти келди. Коронавирус бирданига йўқолиб қолмади, аммо энди чекловлар керак эмас. Энди бизда вакцина бор", – деди штат губернатори Грег Эббот.
Ўз навбатида Миссисипида чоршанбадан бошлаб жамоат жойларида ниқоб тақиш режими бекор қилинади.
"Шифохонага ётқизишлар ва касалланиш ҳолатлари кескин камайди, вакцина эса жадал тарқатилмоқда. Вақт бўлди", – деди штат губернатори Тейт Ривз.
АҚШ касалликларни назорат ва профилактика қилиш маркази директори Рошел Валенски эса ҳукуматни карантинни бекор қилишдан огоҳлантирди.
"Аксарият штатлар одамларни коронавирусдан ҳимоя қилиш учун берган тавсияларимизни бекор қилаётгани тўғрисидаги хабарлардан хавотирдаман", – деди у.
Аввалроқ АҚШнинг бош инфекционисти Энтони Фаучи 2022 йилда ҳам тиббий ниқоб тақишга тўғри келиши мумкинлигини айтганди.
Коронавирус
