Германияда карантин март ойи охиригача узайтирилди 

Германияда карантин режими март ойи охиригача узайтирилади, бироқ ҳукумат эпидемиологик вазият имкон берса, чекловларни эртароқ юмшатишга келишиб олди. Бу ҳақда Германия канцлери Ангела Меркел хабар қилди.

Zuddeuche Zeitung нашрининг маълум қилишича, Германияда карантин режими 28 мартгача узайтирилади, бироқ чекловлар юмшатилиши 8 мартдан бошланиши мумкин. Жумладан, 100 минг аҳолига касалланиш ҳолати 50тадан камни ташкил қилган ҳудудларда китоб ва гул дўконлари очилади. Бундан ташқари, ташриф учун олдиндан буюртма берилган ҳолда музейлар, галереялар, ботаника боғлари ва ҳайвонот боғлари очилиши мумкин.   

Агар касалланиш даражаси пасаядиган бўлса, 2 ҳафтадан кейин чекловлар юмшатилишининг янги босқичига ўтилиши мумкин. Жумладан, коронавирусга манфий тест тақдим қилган ҳолда театр, концерт, опера ва кинозалларга ташриф буюришга рухсат берилиши мумкин.  

Меркелнинг таъкидлашича, чекловларнинг бекор қилиниши ҳақидаги қарорни ҳудудлар маъмурияти қабул қилади.

Бу орада Германия вице-канцлери Олаф Шолц Zuddeuche Zeitung’га берган интервьюсида коронавирусга қарши эмланганлар учун чекловларни бекор қилиш зарурлигини айтиб ўтган. У вакцина олганларга манфий экспресс-тест талаб қилинувчи барча жойларга киришга рухсат берилиши кераклигини айтган.