Словакия бош вазири ноўрин ҳазили учун украиналиклардан узр сўради

Словакия бош вазири Игорь Матович Россияга “Спутник V” вакцинаси эвазига Украинанинг Карпаторти областини беришга тайёрлиги ҳақидаги ҳазили учун Twitter’даги саҳифасида украиналиклардан узр сўради.

“Словакиянинг Украинанинг ҳудудий яхлитлиги бўйича позицияси доимо аниқ бўлган. Ноўрин муносабатим учун барча украиналиклардан узр сўрайман. Словакия – сенинг дўстинг”, деб ёзган Матович.

Аввалроқ Словакия бош вазири интервью вақтида Россия Словакияга ўз вакцинасини етказиб бергани учун нима олиши мумкинлиги ҳақидаги саволга Россияга Карпатортини беришга тайёрлигини айтган. Сўнгра у ҳазиллашаётганини ва унинг олдида ҳамюртларига хавфсиз вакцинани етказиб бериш вазифаси турганини айтган.

Бироқ Словакия бош вазирининг ҳазили украиналикларнинг ғазабига сабаб бўлган. Улар Матовични ижтимоий тармоқларда танқид остига олиб, унинг сўзларини ўзга ҳудудларга даъво қилиш деб баҳолашган.

Украина ташқи ишлар вазирлиги Словакия бош вазиридан узр сўрашни талаб қилган ва Словакиянинг Украинадаги ишончли вакилига норозилик билдирган. Жумладан, Украина ташқи ишлар вазири Дмитрий Кулеба Матовични давлатлар ўртасидаги дўстона муносабатларни бузишга интилишда айблаган.  

1 март куни Словакияда Россиянинг “Спутник V” вакцинаси рўйхатдан ўтказилгани ва мамлакатда вакцинанинг Европа дори воситалари агентлигида рўйхатдан ўтказилиши кутиб ўтирилмасдан қўлланиши бошланиши мумкинлиги маълум бўлган.   

Собиқ иттифоқ ва Чехословакия ўртасида 1945 йил 29 июнда Карпатортининг Украина таркибига кириши ҳақида келишув имзоланган.