Ўзбекистон маҳсулотлари учун 20та давлатда савдо уйлари очилади — Мухтор Умаров

Бунда, савдо уйи деганда кенг миқёсда савдо операцияларини олиб борадиган кўп тармоқли савдо компаниялари назарда тутилади.

Бу ҳақда Ўзбекистон Иқтисодиёт ассамблеяси раиси Мухтор Умаровга асосланиб, Kun.uz мухбири хабар бермоқда.

Умаровнинг айтишича, савдо уйларини ташкил этиш икки босқичда амалга оширилади: биринчи босқичда 20та давлатда ваколатхоналар очилган бўлса, иккинчи босқичда ушбу давлатларда савдо уйлари очилади.

«Ўзбекистон Евросиёнинг ўртасида жойлашган мамлакат бўлгани учун унда савдо коридорларига ҳаб вазифасини бажариш учун катта имкониятлар мавжуд. Германиянинг «Luno group» компанияси билан шартнома имзолаш арафасидамиз. Улар Ҳамбург портида Ўзбекистон маҳсулотлари учун савдо (бизнес) уйини очиб беради, Ўзбекистонда эса Европа ва Германия маҳсулотлари учун бизнес уйини очиш режалаштирилган», – дейди ассамблея раиси.

Мухтор Умаровга кўра, савдо уйларини ташкил этиш логистика харажатларини пасайтириши мумкин, чунки юклар катта оқимда ҳаракатлана бошлайди.

«Германияда савдо уйини ташкил этиш Европага очаётган коридоримиз бўлса, иккинчиси – Россия Федерацияси. «Aстрахан» портида (эркин савдо зонасида) Ўзбекистон маҳсулотлари катта ҳажмда эркин савдо марказига боради ва у ердан Россия ва МДҲ давлатларига маҳсулотларимизни тарқатишимиз мумкин. Бу орқали йўл харажатларини пасайтиришга эришамиз.

Шунингдек, Туркия маҳсулотлари учун Ўзбекистонда, Ўзбекистон маҳсулотлари учун Истанбул шаҳрида савдо уйи очилади. Маҳсулотларимиз Туркия ва унинг қўшни давлатларига, шунингдек, Aфрикага тарқатилади», – деди у.

Мухтор Умаровга кўра, 2020 йилдан савдо уйларини молиялаштиришда давлат томонидан 50 фоизгача субсидия бериш механизми ишга тушди. Нафақат савдо уйини ташкил этиш, балки у ердаги реклама, йўл харажатлари 50 фоизгача субсидияланади.

«Иқтисодиёт ассамблеяси тадбиркорларга ушбу субсидияларни олишда ёрдам беради. Тўғри, савдо уйларининг харажатлари бизга оғирлик қиляпти. Ҳозирча Нью-Йоркнинг Бруклин қисмида савдо уйимизни очганмиз. Aфғонистоннинг Мозори-Шариф ва Қобул ҳамда Украинанинг Киев шаҳрида ҳам савдо уйи очилмоқда», – деди яқинда ассамблея раиси Kun.uz билан суҳбатда.

Ўзбекистон Иқтисодиёт ассамблеяси 2021 йил 10 феврал куни ташкил этилган бўлиб, у 12та маҳаллий илғор ассоциация ва миллий марказларни бирлаштирган. Aссамблея нодавлат бизнес сектори вакилларининг манфаатларини ҳимоя қилишни мақсад қилган.

Aввалроқ Иқтисодиёт ассамблеяси ва экспортчилар уюшмаси раиси Мухтор Умаров «совет» давридан қолган экспорт режаси, махсус банк хизматларининг йўқлиги, экспорт қилувчиларга жарималар қўллаш амалиёти борлиги каби муаммолар экспортчи тадбиркорларни қийнаб келаётганини таъкидлаганди.