Islom.uz порталининг мобил иловалари тақдимоти бўлиб ўтди

27 март куни «Ҳилол-нашр» нашриётида марҳум шайх Муҳаммад Содиқ Муҳаммад Юсуф ҳазратлари асос солган islom.uz портали мобил иловаларининг тақдимоти бўлиб ўтди.

Kun.uz мухбирининг хабар беришича, тадбирда порталнинг «Islom.uz», «Hilol e-book», «Олтин силсила», «Қуръони Карим», «Тафсири Ҳилол», «Зикр аҳлидан сўранг», «Абдураҳмон Қуръон», «Абдулмалик Қуръон», «Қуръон тартили», «Намоз», «Зикр ва дуолар», «Жавоҳир (арабча-ўзбекча луғат)» каби иловалари тақдим қилинди.

Дастурчилар ва иловаларни яратишда меҳнат қилганлар «Ҳилол нашр» нашриёти ва islom.uz портали раҳбари Исмоил Муҳаммад Содиқ томонидан тақдирланди.

Тадбирда шунингдек, «Шайх Муҳаммад Содиқ Муҳаммад Юсуф» жоме масжиди имом ноиби Ҳасанхон Яҳё Абдулмажид сўзга чиқиб, илм учун қўлдан келганча ёрдам беришга ҳамда илм ўрганаётган ва ўргатаётган инсонларни имкон бўлса моддий томонлама қўллаб туришга, илм ривожи учун Аллоҳ йўлида доимо камарбаста бўлиб хизмат қилишга, яхшилик йўлида ҳамкор бўлишга чақирди.

Маълум қилинишича, сайтда янги minbar.islom.uz деб номланувчи бўлим ишга тушмоқда. Унда юртимиз уламоларини бир майдонда бирлаштириб, устозлар, домлалар, имомлар ва илм аҳлларининг соф Ислом таълимотларига асосланган илмий-маърифий мақолалари, аудио ҳамда видеороликлари ўзбекзабон диндошларга тақдим этиб борилиши режалаштирилган.