Италияда Россия фойдасига жосуслик қилишда айбланиб икки киши қўлга олинди

Россиялик офицер қўлга олинганидан сўнг Россия элчиси Италия ташқи ишлар вазирлигига чақиртирилган.

Римда Россия элчихонасида аккредитациядан ўтган россиялик офицер ва Италия ҳарбий-денгиз флоти капитани қўлга олинди. Улар Россия фойдасига жосуслик қилиш ва давлат сирини ошкор этишда айбланмоқда. Бу ҳақда Il Messaggero нашри хабар берди.

"Операция италиялик офицер пул эвазига махфий ҳужжатларни унга берган вақтда ўтказилди. Офицер ҳибсга олинди, хориж фуқаросининг ҳолати унинг дипломатик мақоми туфайли кўриб чиқилмоқда", - дейилади хабарда.

ТАССнинг хабар беришича, россиялик офицер қўлга олинганидан сўнг Россия элчиси Италия ташқи ишлар вазирлигига чақиртирилган.

Аввалроқ Болгарияда Россия элчихонасининг икки ходими персона нон грата деб эълон қилинганди.