АҚШда Johnson & Johnson’нинг 15 миллион доза вакцинаси яроқсизга чиқарилди 

Johnson & Johnson компаниясининг 15 млн доза вакцинаси Балтимор шаҳридаги заводда йўл қўйилган хатолик сабабли яроқсизга чиқарилди. Завод ишчилари Johnson & Johnson вакцинасига бошқа компания вакцинаси таркибий қисмларини қўшиб юборишган.        

The New York Times нашрининг таъкидлашича, вакцина таркибий қисмларини аралаштиришдаги хатолик бир неча ҳафта олдин юз берган. 

Johnson & Johnson вакцина ишлаб чиқариш учун Балтимордаги Emergent BioSolutions компаниясини ёллаган. Айнан шу компания ишчилари хатоликка йўл қўйган. Таъкидланишича, компанияга мутасадди идоралар томонидан вакцина ишлаб чиқариш учун ҳали рухсат берилмаган бўлган.  

Johnson & Johnson’да маълум қилинишича, вакцинанинг Балтиморда ишлаб чиқарилган партияси сифат назоратидан ўтмаган.  

АҚШ президенти Жо Байден маъмурияти Johnson & Johnson’дан келгусида вакцинаси ишлаб чиқарилишини бевосита ўзи назорат қилишини сўраган. 

Таъкидланишича, ҳозирда мутасадди ташкилотлар заводда текширув ўтказмоқда. Корхонани белгиланган стандартларга келтириш учун бир неча кун ёки ҳаттоки ҳафталар талаб этилиши мумкин.

Johnson & Johnson вакцинаси ҳозирда АҚШда коронавирусга қарши қўлланаётган уч вакцинадан бири ҳисобланади. Айтиш жоиз, АҚШда вакцинанинг Нидерландияда ишлаб чиқарилган партиясидан фойдаланилмоқда. Шу сабабли Балтиморда юз берган ҳодиса аҳолини эмлашга катта таъсир ўтказмаслиги, бироқ вакцина етказилишини ортга суриши мумкин.

Johnson & Johnson вакцинаси бир компонентли бўлиб, унинг самарадорлиги 66,1 фоизга баҳоланган.