Бир гуруҳ америкаликлар Apple’ни ёлғон ахборот беришда айблади

Wccftech порталининг хабар беришича, Apple ўз смартфонларининг сувдан ҳимояланганлик даражасини белгилашда ҳеч қандай аралашмасиз тоза сув қўлланган ҳолда ўтказилган лаборатория тадқиқотлари натижаларига таянади.

Бу эса агар смартфон таркибида турли аралашмалар бўлган сув таъсирига учраса, компаниянинг кафолати бундай қурилмага амал қилмаслигини англатади. Мисол учун, агар қурилма ичига бассейндаги хлорли сув ёки денгиздаги шўр сув тушса, фойдаланувчи компаниянинг кафолатидан фойдалана олмайди. 

 Арзчилардан бири Антуанетта Смитнинг таъкидлашича, унинг смартфони қурилманинг рекламасида кўрсатилган кўрсаткичлардан ошмаган сув таъсирига учраган. Бироқ компания зиённи қоплашдан бош тортган. Шу сабабли аёл қурилмани таъмирлашга ўз ёнидан пул тўлашга, кейинроқ эса умуман янги смартфон сотиб олишига тўғри келган.

 Даъвогарлар компаниядан товон пули тўланишини ва ўз маҳсулотини тақдим қилишдаги ёндашувини ўзгартиришни талаб қилишмоқда.

Таъкидланишича, iPhone қурилмалари сувдан ҳимоялангани эвазига муайян вақт сувда қолиши ва бузилмаслиги мумкин. Жумладан, компаниянинг охирги модели – iPhone 12 ҳеч қандай зарар етмаган ҳолда 6 метргача сув остида 30 дақиқа қолиши мумкин.

Март ойида iPhone 12 эгалари қурилма корпусининг ранги ўчиб кетаётганидан шикоят қилишган. Бироқ компаниянинг хизмат кўрсатиш марказлари «моделнинг ранги ўчиши унинг ишлаш қобилиятига ҳеч қанақасига таъсир қилмаслиги» важи остида бундай смартфонларни кафолат бўйича олишдан бош тортган.