Китоблик ота фарзандлари учун 6 500 доллар алимент тўлади

Қашқадарё вилояти Китоб туманида яшовчи ота фарзандлари учун 6 500 доллар алимент пулларини тўлаб берган. Бу ҳақда МИБ вилоят бошқармаси хабар бермоқда.

Маълум қилинишича, фуқаролик ишлари бўйича Шаҳрисабз туманлараро судининг 2017 йил 6 мартдаги суд буйруғига асосан қарздор О.И.дан ундирувчи М.У. фойдасига 2 нафар вояга етмаган фарзандининг моддий таъминоти учун даромадининг учдан бир қисми миқдорида алимент ундириш белгиланган. Мазкур ундирувнинг ижро ҳужжати МИБ Китоб туман бўлими иш юритувида бўлган.

Қайд этилишича, қарздор ота шу вақтга қадар алимент пулларини ўз вақтида тўлаб келган. Шунингдек, О.И. фарзандлари вояга етгунига қадар бўлган алимент пулларини тўлаш истагини билдириб, ундирувчи билан ўзаро келишган. Сўнг, жами 6 500 долларни тўлаб берган. Ушбу пуллар тилхат асосида болаларнинг онасига топширилган.