Америкалик дипломатларга Россия бўйлаб эркин ҳаракатланиш тақиқлаб қўйилди

Россия ҳукумати АҚШ билан «очиқ қуруқлик» ҳақидаги меморандум амал қилишини тўхтатди. Ушбу ҳужжат россиялик ва америкалик дипломатларга мос равишда АҚШ ва Россия ҳудуди бўйлаб эркин ҳаракатланиш ҳуқуқини берган. Россия ташқи ишлар вазирлигида таъкидланишича, меморандум АҚШ томонидан Москвага нисбатан киритилган навбатдаги санкцияларга жавобан бекор қилинган.

Меморандум Вашингтонда 1992 йил июнда имзоланган эди. Ҳужжат «ёпиқ ҳудудлар» тушунчасини бекор қилган ва дипломатларга фаолият юритаётган давлатларининг махсус рухсат талаб қилинмаган ҳудудларида эркин ҳаракатланиш имконини берган. Шунингдек, улардан сафарлар амалга ошириш учун рухсат олиш талаб қилинмаган.

Россия ташқи ишлар вазирлиги АҚШнинг янги санкцияларига жавобан меморандумни бекор қилмоқчилигини апрелда маълум қилганди.

Апрелда Вашингтон Москвага нисбатан янги санкциялар киритилишини эълон қилган. Жумладан, АҚШ 10 нафар россиялик дипломатни ўз ҳудудидан чиқариб юборганди. Вашингтоннинг таъкидлашича, улар орасида Россия махсус хизматлари ходимлари ҳам бўлган.