Ёнғинлар сабабли Калифорниянинг минглаб аҳолиси эвакуация қилинади

АҚШнинг Калифорния штатида кенг кўламдаги ёнғинлар сабабли минглаб аҳолини эвакуация қилиш буюрилди. Бу ҳақда Плумас округи шерифи маъмурияти маълум қилди.

Плумас округида ёнғин 188 гектар майдонни қамраб олди. Маҳаллий аҳолининг 39 фоизи эвакуация қилинди. Ёнғинга қарши курашга беш мингдан ортиқ ўт ўчирувчи сафарбар қилинган. Тўрт киши бедарак йўқолган деб ҳисобланмоқда.

CNN телеканалининг маълумот беришича, штатда 25 кундан буён ёнғинга қарши кураш олиб борилмоқда.

Олов Бютт, Лассен ва Техейма округларига етиб келган. Аввалроқ Плумас округидаги Гринвилл шаҳри ёнғин оқибатида буткул йўқ бўлгани хабар қилинганди.