Франция АҚШ ва Австралиядаги элчиларини чақиртириб олишга қарор қилди

Ташқи ишлар вазири Жан-Ив Ле Дрианнинг қайд этишича, ушбу қарор Франция президенти Эммануэл Макроннинг кўрсатмасига асосан қабул қилинган.

Фото: REUTERS / Christophe Petit Tesson/Pool

AUKUS альянсини тузиш тўғрисидаги келишув имзоланганидан сўнг Франция АҚШ ва Австралиядаги элчиларини чақиртириб олишга қарор қилди. Бу ҳақда Al Jazeera телеканали хабар берди.

Франция ташқи ишлар вазири Жан-Ив Ле Дрианнинг қайд этишича, ушбу қарор Австралия ва АҚШнинг "жиддий баёнотлари" сабабли Франция президенти Эммануэл Макроннинг кўрсатмасига асосан қабул қилинган.

Вазир шунингдек, Австралиянинг Франция сувости кемаларини сотиб олиш бўйича шартномани бекор қилишини "номақбул ҳаракат" деб атади.

Аввалроқ АҚШ, Британия ва Австралия ўртасида мудофаа соҳасида янги альянс – AUKUS’га асос солинди.

Альянснинг биринчи ташаббусларидан бири сифатида Австралияни сувости кемалари билан таъминлаш кўрсатилган. Шу сабабли Австралия Франция билан сувости кемалари етказиб бериш бўйича шартномадан чиққан. Париж ўз иттифоқдошларининг бу қарорини “орқадан пичоқ санчиш” деб баҳолаган.