Венгрия Украинани мамлакатнинг ички ишларига аралашишда айблади

Киев Будапештни Россиянинг “Газпром” компанияси билан 15 йиллик келишув имзолагани учун танқид қилганидан сўнг Венгрия Украинани  мамлакатнинг ички ишларига аралашишда айблади, деб хабар берди Reuters.

Венгрия ташқи ишлар вазири Петер Сийярто Facebook саҳифасида Венгрия Киевнинг кескин баёнотидан сўнг Украина элчиси ТИВга чақиртирилганини маълум қилди.

“Украина Венгрияга хавфсиз газ етказиб берилишини блоклашни истаётганини суверенитетимиз бузилиши деб ҳисоблаймиз ва Украина элчисини ташқи ишлар вазирлигига чақиртирдик. Украина биздан сезиларли ёрдам олганидан сўнг биз бу қадамни нодўстона деб биламиз”, – дейилади Сийяртонинг баёнотида.

Ўз навбатида, Украина ташқи ишлар вазирлиги ҳам Венгрия элчисини чақиртирди. 

“Украинани айланиб ўтиб газ олиш мамлакатимиз миллий хавфсизлиги ва Европа энергетик хавфсизлигига путур етказади. Украина миллий манфаатларини ҳимоя қилиш учун қатъий чоралар кўради”, – деди Украина ТИВ матбуот котиби Олег Николенко.

27 сентябр куни Россия ва Венгрия газ етказиб бериш бўйича янги шартнома имзолади. Унга кўра, Россия Венгрияга йилига 4,5 миллиард куб метр газ етказиб беради: 3,5 миллиард куб метрини Сербия ва бир миллиард куб метрини Австрия орқали.