Байден кортежидаги автомобил Римда йўл-транспорт ҳодисасига учради

АҚШ президенти Жо Байденнинг кортежидаги автомобил Италия пойтахти Римда кичик йўл-транспорт ҳодисасига учради. Аввалроқ Байден Римга “Катта йигирмалик” саммитида иштирок этгани келганди.

Оқ уй вакилининг таъкидлашича, воқеа кортеж Ватикандан чиқиб Италия президенти қароргоҳи Квиринал саройи томон йўналаётганда юз берган. “Ҳеч ким жиддий жароҳат олмади. Бироқ эҳтиёт чораси сифатида машинадаги одамлар тиббий ходимлар томонидан кўздан кечирилди”, деб айтган манба. 

У ЙТҲ тафсилотлари ва машинада ким ўтирганига аниқлик киритмаган.

Ватиканда Байден Рим папаси Франциск билан учрашган. Шундан кейин у Италия президенти Сержо Маттарелла билан учрашгани Квиринал саройига йўл олган.

30-31 октябрда “Катта йигирмалик”нинг саммити бўлиб ўтади. Айни вақтда G20’да Италия раислик қилмоқда.