G20 пандемиядан кейинги тикланиш бўйича чораларни белгилаб олди

“Катта йигирматалик” давлатлари етакчилари Римда 30-31 октябрда ўтган 16-саммит якунларига кўра якуний баёнот қабул қилди. G20 унда коронавирус пандемияси, иқтисодий таҳдидлар, глобал исиш, ноқонуний миграцияга қарши курашиш чоралари бўйича келишиб олди.

Фото: consilium.europa.eu

Асосий масалалар орасида эмланганлик ҳақидаги сертификатларга умумий талабларни ишлаб чиқиш ва пандемия шароитида халқаро сафарларни тиклаш бўлди.

Қуйида “Катта йигирматалик” белгилаб олган чораларнинг асосийлари келтирилган.

COVID-19 пандемияси бўйича

коронавирусга қарши вакцина ва дорилардан барчанинг фойдаланишини таъминлаш;
халқаро сафарларда умумий стандартлар, жумладан эмланганлик ҳақидаги сертификатларга талабларни таъминлаш;
2022 йил ярмигача дунё аҳолисининг 70 фоизини эмлаш;
пандемия шароитида вакциналар ишлаб чиқилиши муддатини 300 кундан 100 кунгача қисқартириш.

Иқтисодиёт бўйича

иқтисодиётга таъсир кўрсатувчи глобал таҳдидларга қарши курашиш;
трансчегаравий коррупция ва солиқ гаванларига қарши курашиш;
пандемиядан кейин иқтисодиётни тиклаш;
туризмнинг тез ва барқарор тикланишини ташкиллаштириш;
халқаро сафарларни тиклашга интилиш;
Экология бўйича
глобал исиш ўсишини 1,5 даражада чеклаш бўйича чоралар қабул қилиш;
иссиқхона газларининг атроф-муҳитга чиқарилишини қисқартириш.

Энергетика бўйича

ишлаб чиқарувчилар ва истеъмолчилар ўртасида мулоқотни йўлга қўйиш;
энергия хавфсизлигини ошириш имкониятларини ўрганиш.
Миграция муаммолари бўйича
мигрантларнинг интеграцияси учун чоралар кўриш;
ноқонуний мигрантлар оқимининг олдини олиш.

“Йигирматалик” етакчилари дунёда иқтисодий фаоллик ишончли суръатлар билан тикланаётганини қайд қилиб ўтишган. Улар буни эмлаш суръатларининг жадаллашаётгани ва сиёсий қўллаб-қувватлаш билан изоҳлашган.