Шавкат Мирзиёев иккинчи президентлик муддатига расман киришди

Бугун, 6 ноябрь куни Олий Мажлис Сенатининг янги биносида Ўзбекистон республикасининг сайланган президенти Шавкат Мирзиёевнинг инаугурация маросими бўлиб ўтяпти.

Фото: Президент матбуот хизмати

Kun.uz мухбири хабарига кўра, парламентнинг ҳар икки палатаси, кенг жамоатчилик кузатиб бораётган тадбир Сенатнинг янги биноси катта залида бошланди ва дастлаб Шавкат Мирзиёевга президентлик рамзлари топширилди. Таъкидлаш жоиз, штандартлар билан боғлиқ бундай маросим Ўзбекистон тарихида илк марта ўтказиляпти.

Залга тантанали равишда қуйидагилар олиб чиқилди: Ўзбекистон байроғи; Президент штандарти; Ўзбекистон Республикаси Конституцияси; Муқаддас Қуръони Карим; Президентлик белгиси.

Дастлаб Марказий сайлов комиссияси раҳбари Зайниддин Низомхўжаев сўзга чиқди ва сайлов жараёни ҳамда натижалар билан таништирди. Шу билан бирга, МСК раиси Шавкат Мирзиёевни ғолиблик билан табриклади ва махсус гувоҳномани топширди.

Шундан сўнг президент тантанали қасамёд қилди ва Ўзбекистон республикаси мадҳияси тингланди. Тадбир давомида Шавкат Мирзиёев нутқ сўзлаши кутилмоқда.

#Шавкат Мирзиёев