Чилонзорда ота ўз фарзанди учун 32000 доллар миқдорида алимент тўлаб берди

Тошкент шаҳри Чилонзор туманида ота ўз фарзанди учун 32000 АҚШ доллари миқдорида алимент тўлаб берди. Бу ҳақда мажбурий ижро бюроси томонидан Kun.uz’га маълум қилинди.

Фото: KUN.UZ

МИБ Чилонзор туман бўлими иш юритувига қарздор Х.Ф.дан ундирувчи А.С. фойдасига 1/4 қисм миқдорида алимент ундириш билан боғлиқ ижро ҳужжати келиб тушган.

Олиб борилган мажбурий ижро ҳаракатлари давомида қарздорнинг ихтиёрий тарзда алимент пулларини фарзанди вояга етгунга қадар тўлашини маълум қилган. Вояга етмаган фарзанди учун 18 ёшга қадар бўлган алимент суммаси ҳисоблаб чиқилганда, алиментчи ота 300 млн сўмдан ортиқ тўлаб бериши маълум бўлди.

Ўз фарзандининг келажагига бефарқ бўлмаган отадан вояга етмаган фарзанди учун А.С. фойдасига 32 000 АҚШ доллари миқдорида алимент пуллари тўлиқ ундирилди ва ундирувчининг тилхати асосида ижро ҳужжати амалда тамомланди.

#алимент #Чилонзор тумани