Оролбўйида яна 1 млн гектар “яшил қоплама” яратилади

Орол денгизининг суви қуриган ҳудудларида 2018-2021 йилларда жами 1,6 млн. гектар майдонда “яшил қопламалар” барпо этилди.

Мутахассисларнинг айтишича, экилганига 3 йил бўлган ўсимликларнинг бўйи 2 метрдан ошган ҳамда чанг ва қумнинг ҳавога кўтарилишини тўхтатишни бошлаган. Маълумот учун, битта саксовул 4-10 тонна кўчки қумини тўхтата олади.

Шунингдек, кейинги 5 йилликда Орол денгизининг суви қуриган туби ва Оролбўйи ҳудудларида 1 млн гектарда чўл ўсимликларини экиш кўзда тутилган.

Оролқумда ўсимликларни экиш янги ўрмон экотизимларини яратгани ва бу ерда қуёнлар, тулкилар, қирғовуллар, ёввойи чўчқалар пайдо бўлган. Академик З.Новицкийнинг маълум қилишича, яқин йилларда ушбу ҳудудда асаларичилик ва туячиликни ҳам ривожлантириш режалаштирилган.

Бир муддат олдин Оролбўйи минтақасининг 4 та туманида солиқ ва божхона имтиёзлари белгиланганди.