Bloomberg 2021 йилнинг энг катта таъсирга эга одамлари рўйхатини тақдим этди

Жумладан, “бизнес” тоифасига Ford компанияси раҳбари Жим Фарли, Discovery телеканали президенти ва ижрочи директори Дэвид Заслав, коронавирусга қарши вакциналардан бирини ишлаб чиққан Pfizer компанияси бош директори Альберт Бурла киритилган.

“Молия” тоифасидан кўплаб бошқа кишилар қаторида Amazon компанияси раҳбари Жефф Безоснинг собиқ рафиқаси Маккензи Скотт жой олган. У собиқ турмуш ўртоғи билан ажрашгандан кейин дунёнинг энг бой аёлларидан бирига айланган ва 8,6 млрд долларга яқин пулни 800 тага яқин хайрия ташкилотига хайрия қилган. Шу сабабли Маккензи Скотт йилнинг энг саховатпеша кишиси деб эътироф этилган.

Агентлик “Сиёсат” тоифасига россиялик мухолифатчи, ҳозирда панжара ортида жазо муддатини ўтаётган Алексей Навальнийни ва 2020 йил охирида ҳибсга олинган ҳонгконглик мухолифатчи Жимми Лайни киритган. Ушбу тоифадан 2021 йил 6 январда собиқ президент Дональд Трампнинг АҚШ конгресси биносига бостириб кирган тарафдорларига қаршилик кўрсатган полициячи Эйжин Гудмен ҳам жой олган.

“Фан ва технология” тоифасидан TikTok ижтимоий тармоғининг бош операцион директори Ванесса Паппас, биринчи Марс вертолётини ишлаб чиққан NASA Ingeniuity лойиҳаси илмий раҳбари Мими Онг, Facebook компанияси фаолияти ҳақидаги ҳақиқатларни ошкор қилган Фрэнсис Хауген жой олган.

“Кўнгилочар” тоифасига рақамли асари 69 млн долларга сотилган америкалик рассом Майк Винкельманн, америкалик қўшиқчи Бритни Спирс ва бошқа кўплаб кишилар киритилган.