Қашқадарёда 51 ёшли эркак ўгай ўғли томонидан ўлдирилди

Қашқадарё вилояти Деҳқонобод туманида 51 ёшли эркак ўгай ўғли томонидан ўлдирилган. Бу ҳақда туман ҳокимлиги ахборот хизмати хабар бермоқда.

Маълум қилинишича, жорий йил 10 декабр куни соат 23:55ларда Деҳқонобод шаҳарчасида яшовчи 51 ёшли Б.Т. туманнинг Завқий маҳалласида яшовчи шаръий никоҳдаги иккинчи хотини Н.Х.нинг уйида 15 ёшли ўгай ўғли томонидан пичоқлаб ўлдирилган.

Дастлабки суриштирувларда аниқланишича, эр-хотин иккаласи 10 декабр куни туман марказидаги ошхонада маст қилувчи ичимлик истеъмол қилган. Сўнг уйга келиб ўзаро жанжаллашиб қолишган. Жанжал давомида марҳум ошхона пичоғи билан хотинига таҳдид қилган.

Буни кузатиб турган 15 ёшли Ш.Ж. маст ҳолда бўлган Б.Т.нинг қўлидан пичоқни тортиб олган. Кейин ўзини ҳимоя қилиш мақсадида уни ўгай отасига санчган. Оқибатда Б.Т. оғир тан жароҳатлари олиб вафот этган.

Мазкур ҳолат юзасидан Деҳқонобод туман прокуратураси томонидан Ш.Ж.га Жиноят кодексининг 100-моддаси билан жиноят иши қўзғатилган. У Жиноят-процессуал кодексининг 221-моддаси тартибида ушланган.