Туркияда коронавирусга қарши маҳаллий вакцинани қўллашга рухсат берилди

Фото: AP

Туркия соғлиқни сақлаш вазирлиги мамлакатда ишлаб чиқилган коронавирусга қарши вакцина Turkovac’ни фавқулодда қўллашга рухсат берди. Бу ҳақда соғлиқни сақлаш вазири Фаҳритдин Хўжа маълум қилди.

Хўжанинг таъкидлашича, рухсатнома Туркиянинг дори воситалари ва тиббий ускуналар бўйича агентлиги томонидан берилган. Инактивацияланган вакцинанинг оммавий ишлаб чиқарилиши йўлга қўйилган.

“Туркия коронавирусга қарши вакцина ишлаб чиққан дунёдаги 9-давлатга айланди. Turkovac кейинги ҳафтадан фаол қўллана бошланади”, деб қўшимча қилган турк вазири.

Туркия президенти Ражаб Тоййиб Эрдўған маҳаллий вакцинанинг ишлаб чиқарилиши жараёни бошланиши маросимида унинг муаллифларини ушбу ютуқ билан табриклаган ва Туркия бутун дунё билан ушбу вакцинани бўлишишини айтган.