Бразилиядаги кўлда сайёҳлар устига қоянинг бир қисми қулади (видео)

Бразилия жануби-шарқидаги Фурнаш кўлида шаршара яқинида қоянинг бир қисми қайиқларда сайр қилаётган сайёҳлар устига қулаб тушиши оқибатида камида етти киши ҳалок бўлди. Яна уч киши бедарак йўқолган, 32 киши жароҳатланган. Яраланганларнинг тўққиз нафари оғир аҳволда шифохонада қолмоқда.

Қидирув ишлари давом этмоқда. Фото: EPA

Ҳодиса рўй берган вақтда туристлар шаршарани томоша қилаётган бўлган. Кутилмаганда қоятошдан катта тошли бўлак ажралган ва сувдаги бир неча қайиқ устига тушган, кўлда катта тўлқин кўтарилган.

Бу ҳолат видеоси ОАВ ва ижтимоий тармоқларда тарқалди.

Видеода моторли қайиқлардан бири чўкиб кетгани, қолганлари қочиб қутулганини кўриш мумкин.

Полициячилар журналистларга хабар қилишича, тош қулашидан яна уч қайиқ зиён кўрган. Бу ҳодиса маҳаллий вақт билан 8 январь куни соат 11:00да рўй берган.

Reuters агентлигининг ёзишича, бунгача икки ҳафта мобайнида Бразилия шарқидаги Минас-Жерайс штатида кучли ёмғирлар ёғган, сув тошқинлари юзага келиб, 17 мингдан ортиқ кишини эвакуация қилишга тўғри келганди. Қутқарувчиларнинг айтишича, бу қоянинг бир қисми кўчишининг асосий сабаби ҳисобланади.

Фурнаш кўли - Минас-Жерайс штатидаги йирик шаршара бўлиб, доимий равишда сайёҳлар эътиборида бўлиб келган / GETTY IMAGES

Табиий ландшафтнинг емирилишда давом этиши истисно қилинмаяпти. Воқеа юзасидан терговга мамлакат ҳарбий-денгиз кучлари жалб қилинган.

Фурнаш кўли 1958 йилда гидроэлектростанция қурилиши вақтида пайдо бўлган ва сайёҳлар кўп ташриф буюрувчи масканлардан бирига айланган. Кўл Сан-Паулудан тахминан 420 км масофада жойлашган.