Фото: Тошкентда дарахтларга «суиқасд» уюштирилди

10 январга ўтар кечаси Тошкент шаҳрининг Юнусобод тумани Амир Темур ва Чинобод кўчалари чорраҳасидаги бир неча сотих майдондаги арчаларга яна ҳужум қилинди. Ўзбекистон Экология ва атроф-муҳитни муҳофаза қилиш давлат қўмитаси матбуот хизмати хабарига кўра, ниқобдаги номаълум шахслар 4 туп элдор қарағайини кесиб қочган.

2021 йил декабрида ҳам Отчопар маҳалласидаги 18 туп дарахтнинг 10 тупи номаълум шахслар томонидан ярмигача арралаб кетилганди. Уларнинг навбатдаги уриниши одамлар арра овозини эшитиб чиққанидан кейин чала қолган.

«Юнусобод туманидаги Амир Темур ва Чинобод кўчалари чорраҳаси ёнидаги бир неча сотихлик жойда 18 дона элдор қарағайи яшнаб турганди. Шу ерни аукцион орқали қўлга киритган фуқаро эса бу дарахтларни бошқа жойга кўчиришга рухсат беришни сўраб мурожаат қилган. Тошкент шаҳар Экология ва атроф-муҳитни муҳофаза қилиш бошқармаси бунга рад жавобини бергандан кейин турфа ўйинлар бошланди.

Дастлаб номаълум кимсалар томонидан тунда 10 та дарахт ярмигача арралаб кетилди. Экологлар эса ушбу дарахтларни қуритмасдан сақлаб қолиш мақсадида Ботаника институти мутахассисларини жалб қилган ҳолда агротехник тадбирларни олиб бориб, уларни асраб қолиш чораларини кўришди. 

Лекин табиатга ваҳшийлик қилишни касб қилган кимсалар орадан маълум вақт ўтгандан кейин қора ниқобда яна кечаси шу атрофда пайдо бўлишади. 4 та дарахтни кесиб, воқеа жойидан қочиб қолишади. Бу ернинг эгаси Ж.Г. эса экологлар устидан ҳуқуқни муҳофаза қилиш органларига шикоят йўллаган. Нима эмиш, дарахт кўчирилишига рухсат берилмагани туфайли унинг ҳуқуқлари бузилганмиш. Суд эса ушбу аризани қаноатлантиришни рад этган.

Ҳозирги кунда мазкур ҳолат бўйича тузилган махсус ишчи гуруҳи қайд этилган манзилда батафсил ўрганиш ишларини ўтказиб, содир бўлган ҳолатга қонуний баҳо бериш учун тўпланган ҳужжатлар Юнусобод туман прокуратурасига топширилди. Тунда дарахтларга атайин шикаст етказаётганларни топиш мақсадида ички ишлар органлари билан ҳамкорликда режали тадбирлар амалга оширилмоқда.

Ўрмон фондига кирмайдиган дарахтларнинг кесилишига жорий этилган мораторий муддатсиз даврга узайтирилган вақтда юз берган бу ҳолатни ҳеч нарса билан оқлаб бўлмайди. Қўмита раҳбарияти ҳуқуқбузарларга нисбатан тез кунда қатъий чоралар кўрилишини изчил назорат қилади ва бу ҳақда жамоатчиликка ахборот бериб боради», дейилади қўмита хабарида.

2021 йил апрелида Kun.uz сайтида ушбу арчазор атрофидаги низо тафсилотлари ёритилганди. Унда 30дан ортиқ арча шу атрофдаги кўп қаватли уйларда яшовчи аҳоли томонидан 2010 йилда экилгани, 2020 йилда бу жойни тадбиркор аукцион орқали қўлга киритгани, сўнг Тошкент шаҳар ҳокимининг қарори билан ер унга бириктириб берилгани ҳақида айтилганди.

Низоли ҳудудни сотиб олган тадбиркор Жалолиддин Газибоев 115 кв метр бўлган мазкур ҳудудни (қарийб 2 сотихлик дарахтзорнинг асосий қисми) 2020 йил ёзида аукцион орқали 976 миллион сўмдан зиёд маблағ эвазига сотиб олганини айтган. 

Ҳужжатларда ер офис биноси ва новвойхона қуриш учун тақдим этилгани кўрсатилган.

Участкага туташ кўп қаватли уйлар аҳолиси қурилишга қарши чиққан. Тошкент шаҳар Экология ва атроф-муҳитни муҳофаза қилиш бошқармаси дарахтларни кўчириб ўтказишни рад этган.

10 январь куни тунда ҳодиса жойига Экоқўмита раиси ўринбосари Жусипбек Казбеков бошчилигидаги қўмита вакиллари ташриф буюрган.

«Ҳар бир ниҳол давлат муҳофазасида эканлиги, табиатга нисбатан ваҳшийларча муносабатда бўлаётганлар қонун олдида жавоб бериши муқаррарлиги таъкидланди. Пойтахтимизнинг ҳар бир ҳудуди тун-у кун экологларнинг қатъий назорати остига олинган бўлиб, қонун устуворлиги сўзсиз таъминланиши борасида ишчи гуруҳ томонидан яна бир бор фикр юритилди», дейилади қўмита хабарида.