Озиқ-овқат маҳсулотлари ишлаб чиқарувчиларига субсидиялар ажратилади

Вазирлар Маҳкамаси “Республикада озиқ-овқат маҳсулотлари ишлаб чиқарувчиларини янада қўллаб-қувватлаш тўғрисида”ги қарорни қабул қилди.

Президентнинг “Республика озиқ-овқат саноатини жадал ривожлантириш ҳамда аҳолини сифатли озиқ-овқат маҳсулотлари билан тўлақонли таъминлашга доир чора-тадбирлар тўғрисида”ги қарорига мувофиқ 20 млрд сўм миқдоридаги маблағлар Қишлоқ хўжалигини ривожлантириш ва озиқ-овқат таъминоти жамғармасига ўтказиб берилади.

Маблағлар қуйидаги харажатларнинг 50 фоизини қоплаб беришга сарфланади:

• озиқ-овқат маҳсулотларини ишлаб чиқариш бўйича янги ташкил этилаётган истиқболли лойиҳаларнинг техник-иқтисодий асосланишини тайёрлашга, лекин ҳар бир лойиҳа учун 100 млн сўмдан кўп бўлмаган миқдорда;
• озиқ-овқат маҳсулотларини ишлаб чиқариш бўйича янги ташкил этилаётган истиқболли лойиҳаларнинг инфратузилмасини яратишга, лекин ҳар бир лойиҳа учун 100 млн сўмдан кўп бўлмаган миқдорда;
• озиқ-овқат маҳсулотларини етиштириш ва уларни чуқур қайта ишлаш соҳасига хорижий экспертларни жалб қилишга, лекин ҳар бир лойиҳа учун 50 млн сўмдан кўп бўлмаган миқдорда.

Қуйидагиларни назарда тутувчи озиқ-овқат маҳсулотлари ишлаб чиқариш йўналишидаги лойиҳаларни ташкил этиш билан боғлиқ харажатларнинг бир қисмини қоплаб бериш тартиби тўғрисидаги низом тасдиқланди:

• озиқ-овқат маҳсулотлари ишлаб чиқариш йўналишидаги лойиҳаларни ташкил этиш билан боғлиқ харажатларнинг бир қисмини қоплаб беришга субсидиялар ажратишга доир тартиб-таомиллар;
• ташаббускорларнинг субсидия ажратиш тўғрисидаги аризаларини кўриб чиқиш тартиби ва муддатлари;
• ташаббускорларга субсидия ажратишни рад этишнинг асослари ҳамда уларнинг ариза билан қайта мурожаат қилиш ёхуд юқори турувчи ташкилотга ёки судга шикоят қилиш ҳуқуқи.

Озиқ-овқат маҳсулотлари ишлаб чиқариш йўналишидаги лойиҳаларни ташкил этиш билан боғлиқ харажатларнинг бир қисмини жамғарма ҳисобидан қоплаб беришга субсидия ажратиш Қишлоқ хўжалиги вазирлигининг қарорига асосан амалга оширилади.