Польша украиналик қочқинларни қабул қилишга тайёрланмоқда

Маълум қилинишича, Польша ҳудудида Украинанинг камида бир миллион нафар фуқароси доимий равишда яшайди.

Фото: Reuters

Польша уруш юз берган тақдирда Украинадан оммавий равишда қочқинлар ўтишига тайёргарлик кўрмоқда. Бу ҳақда Польша миллий хавфсизлик бюроси раҳбари Павел Солох маълум қилди.

«Президент бу масала бўйича ҳукумат билан маслаҳатлашмоқда, вазирлар маҳкамаси бу ҳолат билан боғлиқ ҳаракатларни тайёрламоқда. Оммавий равишда қочқинлар ўтиши вариантини эътиборга олишимиз шарт», — деди Солох.

Унинг сўзларига кўра, Польша ҳудудида Украинанинг камида бир миллион нафар фуқароси доимий равишда яшайди.

Охирги вақтда оммавий ахборот воситаларида Россиянинг Украинага бостириб кириши ҳақида тез-тез айтилмоқда. Россия бу иддаоларни рад этиб келмоқда.