Наманганда коллеж ўқувчилари 85 миллион сўмлик компьютерларни ўғрилади

2004 йилда туғилган икки нафар коллеж ўқувчиси Наманган шаҳрида жойлашган компьютерхонага эшик қулфини калит танлаш йўли билан очиб кириб, ўғрилик содир қилган. Бу ҳақда Наманган вилояти ИИБ ахборот хизмати хабар бермоқда.

Қайд этилишича, ўғрилик 28 январь куни содир бўлган ва компьютерхонада бўлган умумий нархи 85.064.000 сўмлик 8 дона компьютерни ўғирлаб кетган.

Мазкур ҳолат юзасидан олиб борилган тезкор-қидирув ва суриштирув ҳаракатлари натижасида, ушбу жиноятни Наманган шаҳридаги касб-ҳунар коллежининг икки нафар 2-босқич талабаси содир этгани аниқланган.

Ушбу ҳолат бўйича Наманган шаҳар ИИО ФМБ ҳузуридаги Тергов бўлинмаси Жиноят кодексининг 169-моддаси 1-қисми билан жиноят иши қўзғатилган.